काठमाडौं। मध्यपुर थिमि नगरपालिकाले मध्यपुर महोत्सव–२०८१ आयोजना गरेको छ ।
आज (बिहीबार) पत्रकार सम्मेलन गरी महोत्सवको बारेमा जानकारी गराइएको हो । नगर प्रमुख एवं महोत्सवका संयोजक सुरेन्द्र श्रेष्ठले पर्यटनलाई स्थानीय विकासको साझेदार बनाउन र स्थानीय सम्पदालाई रोजगारी एवं आयसँग जोडेर अर्थतन्त्रलाई थप प्रगतिशील बनाउने अवधारणामा महोत्सवको आयोजना गरिएको बताएका छन् ।
महोत्वस आगामी पुस १२ देखि १४ सम्म चल्ने भएको छ । महोत्सवको मूल उद्देश्य मध्यपुरलाई नयाँ पर्यटकीय गन्तव्यको रुपमा विकास गरी दीर्घकालिन रूपमा नगर र नगरबासीको आर्थिक समृद्धिमा टेवा पुर्याउनु रहेको बताइएको छ ।
महोत्सवले नगरको स्थानीय कला, संस्कृति र सम्पदाको प्रदर्शन गर्ने, स्थानीय मौलिक पेशा, परिकार र उत्पादनको प्रवर्धन गर्ने, मध्यपुरलाई पर्यटकीय गन्तव्यको रूपमा परिचित गराउने र समय–समयमा हुने ऐतिहासिक जात्रा पर्वहरूको विषयमा जानकारी गराई सो समयमा पर्यटकको आगमन गराउने अपेक्षा गरिएको छ । महोत्सव थिमि शंखधरचोकबाट शुरु भई विभिन्न कार्यक्रम र प्रदर्शनी गरिने बताइएको छ । बालकुमारी, चपाचो, नगदेश र वोदे हुँदै तिगनिको नीलबाराही लगायतका ऐतिहासिक बस्तीक्षेत्रमा महोत्सव सञ्चालन हुने बताइएको छ ।
महोत्सवमा नगरका विभिन्न स्थानमा करिव ४ सय स्टल रहने छ । स्थानीय मौलिक कला संस्कृतिका अन्तर्गत २५ वटा विभिन्न नाचहरु प्रदर्शन हुने र साँस्कृतिक बाजागाजा तर्फ २६ प्रदर्शनी हुने बताइएको छ ।
